Gen 4 | WSK | STEP | Adam ko nuwus ilak bagaram se ko nuwus tuagu aratam. Nu kuriang kari iluwam ale balam, “Kari Biya aninga saongam se kuriang kari iluwem.” Se ko nup beteram Cain.

Genesis 4

Cain se Abel

1 Adam ko nuwus ilak bagaram se ko nuwus tuagu aratam. Nu kuriang kari iluwam ale balam, “Kari Biya aninga saongam se kuriang kari iluwem.” Se ko nup beteram Cain. 2 Udagi te kuriang bo tala iluwam, Abel, Cain ko uria.

Abel mu nu sipsip nunga bitarukaso, se Cain mu nu ningam ura ilukaso ale na inang asurukaso. 3 Udagi te Cain na inang sang giam ale ago nama Kari Biya tama tuam. 4 Se Abel mu sipsip ningi gotek laun mu sang nunga giam ale nunga moram se kueman. Ale nunguning welang ago mu la giam ale ago nama Kari Biya tama tuam. Kari Biya Abel ko amilmilakaso, ale ko tama beteram mu ago ko amilmilakaso. 5 Bare nu Cain ko me amilmilakaso, ale ko tama beteram mu ko me amilmilakaso tala. Se Cain ninguru gomang motam ikuwuram se koma motam tiromorom kelegam. ^{▼▼Gen 4:5 Cain: Heb 11:4 1 John 3:12 Jude 11.}

6 Se Kari Biya Cain isuam, “Ni anape ko gemang magoso ale kema magaram? 7 Ni munan ningo beterem ale mu, ni amilmilasam ale. Bare ni kilek memek beterem. Buta se kilek memek mu barasam ale lion iwita ka morukko negawoso. Se ni gemang nunguru ale nu kierko.”

8 Udagi te Cain ko uria Abel maonam, “Tair se namanak geraga se laganakko,” mam. Se nuna ilagala namaman geragawa Cain barasam ko uria moram.

9 Kam me maiyam Kari Biya Cain isuam, “Nika uria Abel apoko ya?” mam.

Se Cain balam, “Ani me ko ikisam,” mam. “Awuk? Ani am aga uria la bitaru se bagirikko ye?”

10 Se Kari Biya Cain maonam, “Ni anape mel beterem? Ani nika uria ko kumik gue ali awete kaparam se ko ikiem. 11 Buta se aitak ani ni memek te ka bitirikko den aora biya balsam. Ni kuwim imi bitar ale tagi toko. Mu awuk se? Ni keta ka kiting te ka uria morem se kueram se kumik gue ali ningi kaparam. 12 Se ni ningam ura ilup ale na inang asuru, bare nunguning me kapurukkowo. Ale keta ka kiwim nunguning bo mena, se am ngual ngual geraga se lagerko.”

13 Se Cain Kari Biya maonam, “Ikup ni ani aisem mu aromemek nunguningkiri, ani giekko me terong. 14 Ni ani ali imi te aga karosam, ka kema te agotala aga karosam. Se ani agiwim mena se am ngual ngual geraga se lagirikko. Se kari bo agarkuk, mu aga moruk se kuerikko.”

15 Bare Kari Biya iwita nu maonam, “Mena. Kari bo ka moruk se kuar, mu ani koma biyala nu tuekko.” Ale nu Cain kumik te kawilis bo beteram, se kari awiriya Cain aringimon, bare kawilis mu aringimon ale me momonko. 16 Se Cain Kari Biya koma te tagaram namaram, ale sor nup “Nod” wore te namaram bagakaso. ^{▼▼Gen 4:16 Nup Nod mu ko nunguning mu ngual ngual geraga.} Sor mu Ningam Eden ko koma worem bausa mu te nu namaram ale bagakaso.

Cain ko numasari se ko taleng girigir

17 Cain ko nuwus kuriang iluwam, se nup beteman Enoch mam. Se udagi te Cain wonong bo nungam, ale wonong mu ko nup ko kuriang nup te beteram Enoch tala mam. 18 Udagi te Enoch ko kuriang Irad aratam. Se Irad ko kuriang mu Mehujael. Se Mehujael ko kuriang mu Methushael. Se Methushael ko kuriang aratam mu nup beteram Lamech i mam.

19 Lamech imet ilagala nunga giam, bo Adah, se bo Zillah. 20 Se Adah Jabal iluwam. Jabal mu kari kawam sel ningi baga se bulmakau nunga bitarsan wore nunga girigir. 21 Jabal ko uria mu Jubal. Jubal mu kari gita musik mambu te kolasan wore nunga girigir. 22 Se Zillah Tubal-Cain iluwam. Tubal-Cain mu kari ain brass te melmasak nungursan wore nunga girigir. Se Tubal-Cain ko koras mu ko nup Naamah.

23 Lamech numi patawu se ko nuwus ari ilagala nunga auram ale iwita nunga maonam, “Adah Zillah ilak,” mam, “aninga agiring ikialko,” mam. “Kari kulak bo aninga moram se ani nu morem se kueram. 24 Kari bo Cain moruk se kueruk, mu memek biyala taukko. Bare kari bo ani aga moruk, mu memek biyala nunguningkiri taukkowo!”

Seth ko kuriang

25 Udagi te Adam ko nuwus kuriang bo kari aking iluwam. Ale balam, “Kaem ani kuriang bo, Abel, Cain moram se kueram, wore ko kuwim te aking aisam.” Buta balam ale nup beteram Seth i mam. 26 Udagi te Seth ko kuriang aratam se Seth nup beteram Enosh i mam. Tom mu te kariimet Kari Biya nup ZZZ patowara duap bita gilingiman.